దుర్గామాత....



దుర్గామాత

మత్తకోకిల...


అండ పిండము లందు నీవెగ నాదిశక్తి మహేశ్వరీ !
చండ చండిక భద్రకాళిక చర్చ ఛాయ సనాతనీ   !
హిండి చండి భవాని మాతృక యీశ్వరీ సురసుందరీ!
నిండు భక్తిగ నిన్ను గొల్చితి  నేరమెంచకు శారదా!!!

 

సిద్ధిధాత్రి ...

 

సిద్ధిధాత్రి

మత్తకోకిల.....


సిద్ధి ధాత్రి! శివాని శంకరి సింహవాహిని చండికా!
సిద్ధయోగుని యర్దభాగిని శ్రీగిరీ భ్రమరాంబికా !
బుద్ధి విద్యల నిచ్చి గావుమ భూతమాత చతుర్భుజా!
వృద్ధి చెందగ సర్వ సిద్ధులు వేడ్కతోకరుణించుమా!!!

 

మహాగౌరి...

 

మహాగౌరి

 

మత్తకోకిల...


చల్లనైనది గౌరి  రూపము చాంద్రి మల్లెల నొప్పుచు
న్నెల్ల లోకము లేలు శాంభవి యిందుమౌళి సభర్తృకా
పల్లవించుచు నందివాహని భాసమాన చతుర్భుజా
తల్లి మమ్ముల బ్రోవు నిత్యము దాక్షి దుగ్గి మహేశ్వరీ!!!

 

కాళరాత్రి....

 

కాళరాత్రి

మత్తకోకిల.....



కాళరాత్రి! కిరాతి కర్వరి కాంతి రూపిణి వందనమ్
కాల దేహిని దైత్యనాశిని కప్పుటైదువ వందనమ్
నీలకేశిని భక్తపాలిని నీలలోహిత వందనమ్
జ్వాలలోచని గార్ధవాహన ఛాయ చండిక వందనమ్!!!

కాత్యాయని...

 

కాత్యాయని

మత్తకోకిల...


కామితమ్ములు దీర్చు తల్లివి కల్పవల్లివి కౌశికీ !
క్షేమ దాయిని శోకనాశిని  సింహవాహిని  షడ్భుజా!
నీమ నిష్ఠల నిన్ను గొల్చిన నిండు సౌఖ్యము సర్వదా!
హైమ శాక్రి  కృపాపయోనిధి యంజలింతును భక్తితో!!!

స్కందమాత...

స్కందమాత

మత్తకోకిల....


స్కందమాత! శివాని !పాటల! సర్వమంగళ  శైలజా!
మందహాసిని బిందురూపిణి మంజు భాషిణి మాలినీ !
స్కందు నీయొడి గారవించుచు చల్లనౌక నుజూపుతో!
వందనమ్ముల నందుకోశివ శంకరీ కరుణించుమా !!!

             

కూష్మాండ మాత....

 

కూష్మాండ

మత్తకోకిల.....



 చిన్ని నవ్వును రువ్వి సృష్టిని చిత్తరంబుగ దీర్చినా!
అన్నపూర్ణవు నాదిశక్తివి సింహయానవు నంబికా  !
సున్నితంబుగ మమ్ము గావుమ సూర్యమండలవాసినీ!
నిన్ను గొల్చెద నన్ని వేళల నీలలోహిత వందనమ్!!!

చంద్రఘంట....

చంద్రఘంట

మత్తకోకిల...




చంద్రఘంట భవాని మాలిని సర్వలోకవశంకరీ !
చంద్ర బింబపు మోము గల్గిన చారులోచని భ్రామరీ!
చంద్ర చూడుని ధర్మభాగిని సర్వపాప వినాశినీ!
చంద్రశేఖరి స్వర్ణరూపిణి సన్నుతించెద భక్తితో!!!

బ్రహ్మచారిణి....

 

బ్రహ్మచారిణి



మత్తకోకిల...




భక్తితో నిను గొల్చు వారికి బ్రహ్మచారిణి రూపునన్
యుక్తి నిచ్చెడి బ్రహ్మవిద్యవు యోగమాయవు పావనీ!
శక్తి పాణికి కన్నతల్లివి  శాంకరీ నగ నందినీ!
ముక్తి నిచ్చెడి జ్యోతి రూపిణి మ్రొక్కు చుంటిని నేసదా!!!

శైలపుత్రి......

 

శైలపుత్రి
 

                                                                  దేవీ నవరాత్రులు
                                    

మత్తకోకిల.....



వందనమ్ములు  శైలపుత్రికి వందనమ్ములు ముందుగన్
విందుగా చలికొండచూలికి విశ్వమాతకు వందనమ్
సుందరంబగు శూలధారిణి శూలి పత్నికి వందనమ్
వందనమ్ములు బాలచంద్రకు వందనమ్ములు భక్తితో!!!